Tuesday, April 5, 2011

ലോട്ടറി: സി.ബി.ഐ അന്വേഷണത്തിന് വഴിതെളിഞ്ഞു

കൊച്ചി: അന്യസംസ്ഥാന ലോട്ടറികളുടെ കാര്യത്തില്‍ ഒടുവില്‍ സി.ബി.ഐ അന്വേഷണത്തിന് വഴിതെളിയുന്നു. അന്വേഷണം സി.ബി.ഐക്ക് കൈമാറുന്നതിന് സഹായകമായ രീതിയില്‍ നിശ്ചിത രൂപത്തില്‍ കേസുകളുടെ വിശദാംശങ്ങള്‍ കൈമാറാന്‍ സംസ്ഥാന സര്‍ക്കാര്‍ സന്നദ്ധമാവുകയും ഇത് ലഭിച്ചാലുടന്‍ അന്വേഷണം സി.ബി.ഐക്ക് കൈമാറുമെന്ന് കേന്ദ്രം വ്യക്തമാക്കുകയും ചെയ്തതോടെയാണ് അനിശ്ചിതത്വം നീങ്ങുന്നത്. ലോട്ടറി കേസുകളില്‍ സി.ബി.ഐ അന്വേഷണം ആവശ്യപ്പെട്ട് തൃപ്പൂണിത്തുറ സ്വദേശി ശിവന്‍കുട്ടി, വി.ഡി. സതീശന്‍ എം.എല്‍. എ എന്നിവരുടെ ഹരജികള്‍ പരിഗണിക്കവേയാണ് സംസ്ഥാന-കേന്ദ്രസര്‍ക്കാറുകള്‍ ഈ നിലപാട് സ്വീകരിച്ചത്. അന്വേഷണം സി.ബി. ഐക്ക് കൈമാറുന്നതിന് ദല്‍ഹി പൊലീസ് എസ്റ്റാബ്ലിഷ്‌മെന്റ് നിയമത്തിലെ ആറാം വകുപ്പ് പ്രകാരം സംസ്ഥാന സര്‍ക്കാര്‍ വിജ്ഞാപനം പുറപ്പെടുവിക്കണമെന്ന് വാശിപിടിക്കുന്നില്ലെന്ന് കേന്ദ്ര സര്‍ക്കാറിനുവേണ്ടി ഹാജരായ സോളിസിറ്റര്‍ ജനറല്‍ ഗോപാല്‍ സുബ്രഹ്മണ്യം വ്യക്തമാക്കി. എന്നാല്‍, രാജ്യത്ത് നിലനില്‍ക്കുന്ന ഫെഡറല്‍ സംവിധാനത്തില്‍ ആവശ്യമായ നടപടിക്രമങ്ങള്‍ പാലിക്കേണ്ടതുണ്ട്. ഭരണഘടനാ പദവി വഹിക്കുന്ന മുഖ്യമന്ത്രി ഉയര്‍ന്ന ആദരം അര്‍ഹിക്കുന്നുണ്ട്. എങ്കിലും കേന്ദ്ര പേഴ്‌സനല്‍ മന്ത്രാലയത്തിന് സി.ബി. ഐയോട് നിര്‍ദേശിക്കാവുന്ന തരത്തിലാകണം സംസ്ഥാന സര്‍ക്കാറിന്റെ നടപടി.

ഏതൊക്കെ കേസുകളാണ് സി.ബി. ഐയെക്കൊണ്ട് അന്വേഷിപ്പിക്കേണ്ടതെന്ന് സംസ്ഥാനം വ്യക്തമാക്കണം. എഫ്.ഐ.ആര്‍ നമ്പര്‍, കേസ് നിലവിലുള്ള പൊലീസ് സ്‌റ്റേഷനുകള്‍ എന്നിവ നിശ്ചിത മാതൃകയില്‍ കേന്ദ്ര സര്‍ക്കാറിന് നല്‍കേണ്ടതുണ്ട്.അന്വേഷണം സംബന്ധിച്ച് സി.ബി.ഐ ഡയറക്ടറോട് ഇതിനോടകം തന്നെ സംസാരിച്ചിട്ടുണ്ട്. അന്വേഷണം ഏറ്റെടുക്കാമെന്നാണ് ഡയറക്ടര്‍ വ്യക്തമാക്കിയത്. നടപടിക്രമങ്ങള്‍ പാലിച്ചാല്‍ അന്വേഷണം ഏറ്റെടുക്കാന്‍ സി.ബി.ഐയോട് ആവശ്യപ്പെടാമെന്ന് മുഖ്യമന്ത്രിയെ അറിയിച്ചിട്ടുണ്ട്. ചീഫ് സെക്രട്ടറിക്കും ഔദ്യോഗികമായി കത്ത് നല്‍കിയിട്ടുണ്ട്.അന്യസംസ്ഥാന ലോട്ടറികളുടെ നിയമലംഘനങ്ങള്‍ക്കെതിരായ സംസ്ഥാന സര്‍ക്കാറിന്റെ പ്രവര്‍ത്തനം ശ്രദ്ധേയമാണ്. ലോട്ടറി നടത്തിപ്പിലെ ചൂഷണവും തുടര്‍ന്നുണ്ടാകുന്ന സാമൂഹിക പ്രത്യാഘാതങ്ങളും മുന്‍നിര്‍ത്തിയാണ് സംസ്ഥാനം മുന്നോട്ട് നീങ്ങുന്നത്. ഇക്കാര്യത്തില്‍ മുഖ്യമന്ത്രി സ്വീകരിച്ച നടപടി അഭിനന്ദനാര്‍ഹമാണെന്നും സോളിസിറ്റര്‍ ജനറല്‍ ബോധിപ്പിച്ചു.

80,000 കോടിയുടെ ലോട്ടറി ക്രമക്കേടും 500 ലേറെ എഫ്.ഐ.ആര്‍ രജിസ്റ്റര്‍ ചെയ്തതും കേന്ദ്രത്തെ നേരത്തേ അറിയിച്ചിരുന്നു.മുഖ്യമന്ത്രി അയച്ച നിരവധി കത്തുകളില്‍ സി.ബി. ഐ അന്വേഷണം വേണമെന്ന് ആവശ്യപ്പെട്ടിരുന്നു. ഒടുവില്‍ സി.ബി.ഐക്ക് കൈമാറാന്‍ തയാറാണെന്ന് കേന്ദ്രം അറിയിച്ചതില്‍ സന്തോഷമുണ്ടെന്നും സംസ്ഥാന സര്‍ക്കാറിനുവേണ്ടി ഹാജരായ അഭിഭാഷകന്‍ നിധീഷ്ഗുപ്ത വ്യക്തമാക്കി. എന്നാല്‍, വിജിലന്‍സ് അന്വേഷണത്തിനുശേഷം 2010 വരെ സര്‍ക്കാര്‍ സി.ബി.ഐ അന്വേഷണം ആവശ്യപ്പെട്ടിട്ടില്ലെന്ന് വി.ഡി. സതീശന്‍ എം.എല്‍.എ ബോധിപ്പിച്ചു.

അതേസമയം, അന്യ സംസ്ഥാന ലോട്ടറികള്‍ക്കുവേണ്ടി നേരത്തേ കോടതിയില്‍ ഹാജരായ കേന്ദ്ര ആഭ്യന്തര മന്ത്രി പി. ചിദംബരം, അവര്‍ക്ക് അനുകൂല നിലപാടാണ് സ്വീകരിക്കുന്നതെന്ന തൃപ്പൂണിത്തുറ സ്വദേശി കെ.എം. ശിവന്‍കുട്ടിയുടെ ഹരജിയിലെ ആരോപണം തെറ്റാണെന്ന് ഗോപാല്‍ സുബ്രഹ്മണ്യം ബോധിപ്പിച്ചു. ചിദംബരം വ്യക്തിപരമായ ആരോപണം നിഷേധിക്കാതെ കേന്ദ്ര സര്‍ക്കാര്‍ സത്യവാങ്മൂലത്തിലൂടെ എതിര്‍ക്കുകയാണോ വേണ്ടതെന്ന് കോടതി ആരാഞ്ഞു. എന്നാല്‍, ചിദംബരത്തിനോ ഭാര്യ നളിനി ചിദംബരത്തിനോ ലോട്ടറി നടത്തിപ്പുകാരുമായി ബന്ധമില്ലെന്ന് കേന്ദ്രം വ്യക്തമാക്കി.