Sunday, June 6, 2010

നട ദുവ്വുരി തോമസ് ഐസക്കിന്റെ ഭാര്യ അല്ലെന്ന് കൈരളി പീപ്പിള്‍; സര്‍ക്കാര്‍ വെബ്സൈറ്റില്‍ നട തന്നെ ഭാര്യ

തൃശൂര്‍: ധനമന്ത്രി ഡോ. തോമസ് ഐസക്കും ഭാര്യ ഡോ. നടദുവ്വുരിയും ഇപ്പോള്‍ ഭാര്യാ ഭര്‍ത്താക്കന്മാരല്ലെന്ന് കൈരളി പീപ്പിള്‍ ചാനല്‍ .550 ലക്ഷം അമേരിക്കന്‍ ഡോളര്‍ നടദുവ്വുരി വിവിധ പദ്ധതികളുടെ പേരില്‍ വിദേശസഹായം സ്വീകരിച്ചെന്ന 'പാഠം' പ്രവര്‍ത്തകരുടെ ആരോപണം 'മാധ്യമം' വിവാദമാക്കിയതോടെയാണ് കൈരളി പീപ്പിള്‍ ചാനല്‍ 'അഴിച്ചുപണി' എന്ന മാധ്യമ വിമര്‍ശ പരിപാടിയിലൂടെ വിശദീകരണവുമായി രംഗത്തെത്തിയത്. ഇതോടെ 'പാഠം' കൊണ്ടുവന്ന ആരോപണങ്ങള്‍ കൂടുതല്‍ ഗൌരവമാകുന്നു. 'തോമസ് ഐസക്കിനും ഭാര്യക്കും എതിരെ പാഠം' എന്ന 2010 മേയ് 21ലെ 'മാധ്യമം' വാര്‍ത്ത ഉദ്ധരിച്ച ശേഷം നിയമപരമായി ഇവര്‍ വേര്‍പിരിഞ്ഞെന്നാണ് ചാനല്‍ വക്താവ് നല്‍കുന്ന വിശദീകരണം. ഇതു സംബന്ധിച്ച് കൂടുതല്‍ വിശദീകരണങ്ങള്‍ക്ക് മുതിരാതെ ഒഴിഞ്ഞുമാറുകയായിരുന്നു ഇദ്ദേഹം.

കേരള മുഖ്യമന്ത്രിയുടെ ഔദ്യോഗിക വെബ്സൈറ്റില്‍ വി. എസ്. അച്യുതാന്ദന്‍ ഉള്‍പ്പെടെ മന്ത്രി സഭാംഗങ്ങളെക്കുറിച്ച് വിശദീകരിക്കുന്ന പേരില്‍ തോമസ് ഐസക്കിന്റെ ഭാര്യ എന്നതിന് നേരെ ശ്രീമതി നടദുവ്വുരി എന്ന് വ്യക്തമായി കൊടുത്തിട്ടുണ്ട്. ഇത് കൂടാതെ മാരാരിക്കുളം എം. എല്‍.എ എന്ന നിലയില്‍ ഇന്റര്‍നെറ്റില്‍ ലഭ്യമായ ബയോഡാറ്റയിലും നട തന്നെയാണ് ഭാര്യയെന്ന് വ്യക്തമാക്കിയിട്ടുണ്ട്. 2006ല്‍ മന്ത്രിയായി സത്യപ്രതിജ്ഞ ചെയ്യുമ്പോള്‍ തോമസ് ഐസക്കിന്റെ ഭാര്യയായിരുന്നു ഇവരെന്ന് വ്യക്തമാണ്. നടക്ക് എതിരെ ഉയര്‍ന്ന വിദേശഫണ്ടുമായി ബന്ധപ്പെട്ട് വിഷയത്തില്‍ നിന്ന് തലയൂരുന്നതോടൊപ്പം പാര്‍ട്ടി കേഡര്‍മാരുടെ ആസ്തിബാധ്യതകള്‍ ശേഖരിക്കുന്ന സി. പി. എമ്മിന്റെ നടപടിയില്‍ നിന്ന് രക്ഷനേടുകയെന്ന ലക്ഷ്യവും ഇതിന് പിന്നിലുണ്ടെന്നാണ് ആരോപണം.

550 ലക്ഷം അമേരിക്കന്‍ ഡോളര്‍ നടദുവ്വുരി വിവിധ പദ്ധതികളുടെ പേരില്‍ വിദേശ സഹായം സ്വീകരിച്ച വിവരം ഇതിനകം പാര്‍ട്ടിക്കകത്തും ചര്‍ച്ചചെയ്യപ്പെടുന്നുണ്ട്.ഈ കാലയളവില്‍ അവര്‍ ഐസക്കിന്റെ ഭാര്യയാണെന്ന് പല രേഖകളിലും വ്യക്തമാക്കിയിട്ടുണ്ട് .'പാഠം' നടക്ക് എതിരെ ഉയര്‍ത്തിയ ആരോപണങ്ങളില്‍ ഇവരുമായി ബന്ധപ്പെട്ട സംഘടനകളെ അമേരിക്കന്‍ സ്റ്റേറ്റ് ഡിപാര്‍ട്മെന്റിന്റെ ചാര സംഘടനകളായാണ് വിലയിരുത്തുന്നത് .